loader
Հայաստանից ԱՄՆ ապրանք արտահանելը կհեշտանա (տեսանյութ)

Հայաստանից ԱՄՆ ապրանք արտահանելը կհեշտանա (տեսանյութ)

Միացյալ Նահանգները, աջակցելով Հայաստանի տնտեսության զարգացմանը, հայաստանցի գործարարներին արտոնյալ պայմաններ է տրամադրում ԱՄՆ հայկական արտադրանքի որոշ տեսակներն արտահանելու համար: Ու թեև այդ հնարավորությունից օգտվում են խոշոր գործարարները, մանր ու միջին ձեռնարկատերերին եղած ընթացակարգերը բարդ են թվում:

Խնդրին փորձել են լուծում տալ Վաշինգտոնում անցած ԱՄՆ-Հայաստան Առևտրի ու ներդրումների խորհրդի նիստի ընթացքում, պատմում է հայկական պատվիրակության ղեկավար, Հայաստանի տնտեսական զարգացման փոխնախարար Հովհաննես Ազիզյանը.

«Մենք պայմանավորվեցինք քննարկել, թե ինչպես է հնարավոր աջակցել հիմնականում հայկական մանր ու միջին բիզնեսի արտահանողներին և օգնել իրենց այդ գործընթացների փաստաթղթային ապահովումն իրականացնել»:

Հայաստանի համար Միացյալ Նահանգները կարևորագույն տնտեսական գործընկերներից մեկն է, նշում է Հովհաննես Ազիզյանը: Նրա խոսքով, 2017 թվականին հայ-ամերիկյան առևտրային շրջանառությունը զգալի ավելացել է.

«2017 թվականին ապրանքների առումով առևտրաշրջանառությունը 200 միլիոն դոլարից ավել է եղել, որը նախկին տարվա համեմատ 70 տոկոսի աճ է»:

Վաշինգտոնում անցած հանդիպումը ցույց տվեց, որ թե՛ Հայաստանում, թե՛ Միացյալ Նահանգներում շահագրգռված են խորացնել տնտեսական գործընկերությունը:

«Խորացումը նշանակում է ոչ միայն առևտրաշրջանառության կամ ներդրումային որոշակի ակտիվության ապահովում այլ նաև շատ դեպքերում դիվերսիֆիկացում», - նշում է փոխնախարարը:

Այսօր Հայաստանից Միացյալ Նահանգներ են արտահանվում ոչ միայն երկրում արտադրված ապրանքներ այլև՝ ծառայություններ, որոնց թվում հաշվառվում է տեղեկատվական տեխնոլոգիաների ոլորտի, ծրագրավորման արտադրանքը: Հենց այդ ուղղությամբ հայ-ամերիկյան համագործակցությունն ունի լուրջ ներուժ:

Հայկական կողմը նաև հավաստիացնում է, որ Երևանին Միացյալ Նահանգների հետ տնտեսական համագործակցության զարգացման հարցում որևէ կերպ չի խոչընդոտում Մոսկվայի կողմից ստեղծված Եվրասիական տնտեսական միությունում անդամակցությունը.

«Հանդիսանալով Մաքսային միության անդամ, դու ունես որոշակի գործընթացներով սահմանափակումներ, որոնք վերաբերում են, օրինակ, հիմնականում ազատ առևտրի ռեժիմին, մաքսասակագնային գործընթացներին, իսկ ինչ վերաբերում է մյուս աշխատանքի ուղղություններին, ապա դրանց համար դու ունես մաքսիմալ ազատություն»:

Ամերիկայի Ձայն

Share
Class
Link
Plus
Send
Pin

ԿԱՐԴԱՑԵՔ ՆԱԵՎ

Լրահոս