loader
Արցախի ԱԳ նախարարը քննարկումներ է ունեցել Կալիֆորնիայի պատվիրակության հետ

Արցախի ԱԳ նախարարը քննարկումներ է ունեցել Կալիֆորնիայի պատվիրակության հետ

Արցախի Հանրապետության արտաքին գործերի նախարար Մասիս Մայիլյանն ընդունել է ԱՄՆ Կալիֆորնիա նահանգի պատվիրակությանը, որի կազմում էին Կալիֆորնիայի Սենատի անդամ Էնթընի Պորտանտինոն և Գլենդելի քաղաքապետ Զարեհ Սինանյանը։

ԱՀ արտաքին գործերի նախարարության տեղեկատվության և հասարակայնության  հետ կապերի վարչությունից հայտնում են, որ ողջունելով պատվիրակության այցն Արցախ՝ ԱԳՆ ղեկավարն ընդգծել է Արցախի անկախության սատարմանն ուղղված Կալիֆորնիայի Վեհաժողովի և Սենատի համատեղ բանաձևի ընդունման կարևորությունը և համոզմունք հայտնել, որ այն ամուր հիմքեր է ապահովել Արցախի և Կալիֆորնիայի միջև տարբեր բնագավառներում արդյունավետ համագործակցություն հաստատելու համար։

Հանդիպմանը քննարկվել են ընթացիկ նախագծերը և Արցախի ու Կալիֆորնիայի միջև տնտեսության, մշակույթի, կրթության և առողջապահության ոլորտներում գործնական ծրագրերի իրականացման հեռանկարները։ Անդրադարձ է կատարվել նաև տարբեր ոլորտների ներկայացուցիչների փոխայցելությունների կազմակերպման հնարավորություններին՝ փորձի փոխանակման և Արցախում մասնագետների որակավորման աստիճանի բարձրացման նպատակով։

Կողմերը մտքեր են փոխանակել նաև Կալիֆորնիայում Արցախի ճանաչելիության և ներկայացվածության խթանմանն ուղղված անելիքների շուրջ։ 

Share
Class
Link
Plus
Send
Pin

ԿԱՐԴԱՑԵՔ ՆԱԵՎ

Լրահոս