loader
Փաշինյանն անդրադարձավ քաղաքացիական ակտիվիստների դեմ հարձակումներին և դիմեց ոստիկանապետին  

Փաշինյանն անդրադարձավ քաղաքացիական ակտիվիստների դեմ հարձակումներին և դիմեց ոստիկանապետին  

Կառավարության նիստում վարչապետ Նիկոլ Փաշինյանն անդրադարձավ ներքաղաքական վերջին շրջանում քաղաքացիական ակտիվիստների նկատմամբ տեղի ունեցած հարձակումների և դրանք քննելու հարցին:

«Ապրիլին ունեցել ենք դեպքեր, երբ հարձակումներ են գործել և ջարդել ավտոմեքենաներ: Այդ գործերը պետք է քննվեն, և լուծվի անձանց ավտոմեքենաների խնդիրը, հասկանալ, ով է այդ պատասխանատվությունը կրելու և բացահայտել բոլոր գործերը»,- «Արմենպրես»-ի հաղորդմամբ, ասաց Նիկոլ Փաշինյանը:

Կառավարության ղեկավարը հիշեցրեց, որ ուսանողների վրա հարձակում էր տեղի ունեցել Հերացի փողոցում, իսկ հարձակման տեսարանը տարածվել է համացանցում:

«Պարզվում է, որ այդ գործը կարճվել է: Պետք է այս գործելակերպին վերջ տալ, արտոնյալ մարդկանց հանդիպելով՝ գնում ենք գործերի կարճման: Մարդիկ պետք է հստակ տեսնեն, որ  գնում ենք գործերը բացահայտելու ճանապարհով, այսօր, ցավոք, այդ ուղերձները չկան, և հույս ունեմ, որ կտեսնենք: Պետք է ստուգվի կարճման որոշման օրինականությունը, որովհետև այն, ինչ մամուլը գրում է, պարզվում է, որ գործերը կարճելը օրենքի հետ կապ չունի»,- ասաց Փաշինյանը:

ՀՀ առաջին փոխվարչապետ Արարատ Միրզոյանն էլ իր հերթին ավելացրեց, որ համաձայն մամուլի տեղեկությունների, մի քանի օր առաջ անհայտ անձինք «Երևան սիթի» խանութի մոտ հարձակում է եղել մի խումբ ակտիվիստների վրա, ովքեր պահանջում են Երևանի քաղաքապետ Տարոն Մարգարյանի հրաժարականը:

Արձագանքելով՝ Նիկոլ Փաշինյանը դիմեց ոստիկանապետ Վալերի Օսիպյանին. 

«Բացառված է բռնության որևէ դեպք, որն ամբողջական քննության չարժանանա: Ինձ չի հետաքրքրում՝ ով է բռնության հեղինակը, և ով է զոհը, քաղաքական որ թիմից է, որ ճամբարից և որ կուսակցությունից: Պետք է ունենանք բռնությունից զերծ հանրություն: Պարոն Օսիպյան, ակնկալում եմ կոնկրետ և արագ գործողություններ»:

Արարատ Միրզոյանը միաժամանակ նշեց, որ պատրաստ է որպես վկա ներգրավվել տարբեր գործերի քննության ընթացքում, քանի որ դրանցից մի քանիսին եղել է ականատես:  

Share
Class
Link
Plus
Send
Pin

ԿԱՐԴԱՑԵՔ ՆԱԵՎ

Լրահոս