Հեշտ ու համեղ. Լոբով ապուր՝ հունական ձևով

Հունական այս ապուրի հետ ավանդաբար չորացրած սպիտակ հաց ու ձիթապտուղ են մատուցում, իսկ ցանկացողներին հենց ափսեի մեջ սոխ ու սխտոր են ավելացնում:

Ուտեստը սկսեք պատրաստել մատուցելուց 14 ժամ առաջ:

Բաղադրիչները

6 բաժնի համար

• 200 գ չոր սպիտակ լոբի
• 1 մեծ գլուխ սոխ
• 1 ճյուղ նեխուր
• 3 միջին չափի գազար
• 400 գ կտրտած լոլիկ իր հյութի մեջ
• 2 ճյուղ մաղադանոս
• 1 ճ.գ. տոմատի մածուկ
• 100 մլ ձիթապտղի յուղ
• 1 ճ.գ. չորացրած խնկածաղիկ
• աղ
• աղացած սև պղպեղ
• 1 լ ջուր

Մատուցելու համար

• սպիտակ հացի չորացրած կտորներ
• փոքր ափսեով խոշոր ձիթապտուղ

Պատրաստման եղանակը

1. Լոբին 12 ժամ դրեք սառը ջրի մեջ: Հետո լվացեք, լցրեք կաթսայի մեջ: Վրան սառը ջուր լցրեք, հասցրեք եռման աստիճանի, եփեք 5 րոպե, ջուրը թափեք:
2. Բարակ կտրատեք սոխը, նեխուրն ու գազարը:
3. Լոբու վրա սառը ջուր լցրեք, ավելացրեք կտրտած բանջարեղենը, լոլիկն իր հյութի հետ միասին, խառնեք:
4. Ավելացրեք ձիթապտղի յուղը, խնկածաղիկը, պղպեղ արեք, դրեք կրակի վրա: Աղ դեռ մի արեք: Հասցրեք եռման աստիճանի ու եփեք, մինչև լոբին փափկի՝ մոտ 1 ժամից-1 ժամ 20 րոպե:
5. Վերջում աղ արեք, ավելացրեք տոմատի մածուկն ու մանր կտրտած մաղադանոսը, խառնեք, թողեք մի քիչ հովանա: 

Մատուցեք չորացրած սպիտակ հացով ու ձիթապտուղներով: