Լցոնած տաքդեղներ

Ձեզ ենք ներկայացնում ֆրանսիական խոհանոցի ուտեստներից մեկը` լցոնած տաքդեղներ: Այս ուտեստի ռուսական կամ կովկասյան տարբերակում նաև բրինձ է օգտագործվում, բայց կան մարդիկ, որոնք այս կամ այն պատճառով բրինձ չեն ուտում: Այս հրաշալի ուտեստից նրանց չզրկելու համար էլ առաջարկում ենք ֆրանսիական տարբերակը, որտեղ միայն միս ու բանջարեղեն է:

Բաղադրիչները

• 6 բաժնի համար
• 6 հատ կանաչ կամ կարմիր միջին չափի քաղցր տաքդեղ
• 300-350 գրամ աղացած միս
• 2 դեղնուց
• 1 կտոր հաց
• 100 մլ կաթ
• 2 մեծ, լավ հասած լոլիկ
• 1 խոշոր գլուխ սոխ
• 1 պճեղ սխտոր
• 4 ճյուղ մաղադանոս
• գինու քացախ
• 2 ճ.գ. ձիթապտղի ձեթ
• կարագ
• աղ
• աղացած սև պղպեղ

Պատրաստման եղանակը

1. Հեռացրեք տաքդեղների պոչային մասը, մաքրեք սերմերից: Կարևոր է, որ տաքդեղները չվնասվեն:
2. Մեծ թավայի մեջ 2 լիտր ջուր եռացրեք, եռացող ջրի մեջ դրեք տաքդեղները, եփեք 8-10 րոպե: Կարագ քսեք տապակին, տաքդեղները շարեք վրան:
3. Լցոնի համար լոլիկները մտցրեք եռացող ջրի, ապա սառը ջրի մեջ, մաքրեք կեղևից ու սերմերից: Սոխը մանրացրեք: Թավայի մեջ տաքացրեք ձիթապտղի յուղը: Նրա մեջ 3-4 րոպե տապակեք սոխն ու լոլիկը:
4. Հացը թաթախեք տաք կաթի մեջ: Երբ հացը թրջվի, մնացած կաթը թափեք: Մանրացրեք սխտորն ու մաղադանոսը:
5. Սոխով ու լոլիկներով թավայի մեջ ավելացրեք աղացած միսը, սխտորն ու մաղադանոսը, հացը: Աղ ու պղպեղ արեք: Ամեն ինչ ինչպես հարկն է խառնեք ու ևս 10 րոպե տապակեք:
6. Արդեն պատրաստի լցոնի մեջ ավելացրեք ձվի դեղնուցները: Տաքդեղների մեջ լցրեք լցոնը, մի քիչ քացախ արեք և 25 րոպե տեղադրեք 170օC ջեռոցի մեջ:

Պատրաստի ուտեստը կարելի է մատուցել և՛ տաք, և՛ սառը վիճակում: